СВЯТОЙ ПРЕПОДОБНЫЙ ИОАНН РЫЛЬСКИЙ.

Тропарь, глас 1:

Покая́ния основа́ние, прописа́ние умиле́ния, о́браз утеше́ния, духо́внаго соверше́ния, равноа́нгельное житие́ твое́ бысть, преподо́бне. В моли́твах у́бо и поще́ниих, и в слеза́х пребыва́вый, о́тче Иоа́нне, моли́ Христа́ Бо́га о душа́х на́ших.


Кондак, глас 2:

Моля́щим тя тепле́йший засту́пниче и прося́щим скоре́йший послу́шателю, преподо́бне о́тче Иоа́нне, приими́ моле́ние на́ше и Христа́ умоли́ поми́ловати нас, Еди́наго Преблага́го и Многоми́лостиваго.


Молитва:

О преподо́бне о́тче Иоа́нне, уго́дниче Госпо́день преизря́дный, те́плый наш засту́пниче и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем сем житии́ и умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́ во всем житии́ мое́м де́лом, сло́вом, помышле́нием и все́ми мои́ми чу́вствы. И во исхо́де души́ моея́ помози́ ми, окая́нному, и умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха и твое́ ми́лостивное предста́тельство, и ны́не, и при́сно, и во ве́ки веко́в. Ами́нь.